Շրջակա միջավայրի նախարարության «Հայաստանի բնության պետական թանգարան» և «Հայանտառ» ՊՈԱԿ-ների համատեղ միջոցառումն անցկացվել է Անտառների միջազգային օրվա առիթով։
Հայաստանի բնության պետական թանգարանի տնօրեն Լիլիթ Գալստյանն իր ողջույնի խոսքում ներկայացրել է անտառների դերն ու նշանակությունը մարդու կյանքում, անտառի և կենսաբազմազանության կապը, ներկայացրել օրվա խորհուրդը և ընդգծել յուրաքանչյուրի դերն անտառների պահպանման գործում։
«Հայանտառ» ՊՈԱԿ-ի տնօրեն Սևակ Մարկոսյանը ներկայացրել է ՊՈԱԿ-ը՝ որպես պետական անտառային ֆոնդերը կառավարող միակ կառույց։
Տնօրենը ներկայացրել է ՊՈԱԿ-ի հիմնական գործառույթները, վերջինիս կողմից կառավարվող տարածքները, անտառտնկման և անտառվերականգնման գործընթացը, անտառները ձևավորող ծառատեսակները, խոսել համագործակցություններից, ֆինանսավորումից, կողմնակի անտառօգտագործումից, թափուկ վառելափայտի տրամադրումից, ՊՈԱԿ-ի կողմից իրականացվող և պլանավորված միջոցառումներից, խնդիրներից։
Սևակ Մարկոսյանն անդրադարձել է նաև մասնակիցների կողմից բարձրացված հարցերի լայն շրջանակի, մասնավորապես՝ անտառների պահպանությանը, կլիմայի մարտահրաավերներին անտառների դիմակայունությանը, ֆինանսավորման աղբյուրներին, ձեռնարկատիրական գործունեության ուղղություններին, ծառատունկեր կազմակերպելու հնարավորություններին։
Որպես կողմնակի անտառօգտագործման արգասիք՝ Սևակ Մարկոսյանը ներկայացրել է նաև Հայաստանի անտառներում ստեղծված անարատ մեղրը, որն արդեն իսկ վաճառվում է մայրաքաղաքի որոշ խոշոր առևտրային կենտրոններում։
Օրվա խորհրդով միջոցառումը համատեղվել է նաև սերմնացանով․ Հայաստանի անտառները կազմող ծառատեսակներից հավաքված սերմերով մասնակիցները ցանքս են կատարել՝ հետագա խնամքի պարտադիր պայմանով։
Միջոցառմանն ամենից ակտիվները խրախուսվել են «Հայանտառ»-ի ջերմատներում աճեցված տնկիներով, շնորհակալագրերով։
Միջոցառումն ամփոփվել է թանգարանի հարակից տարածքում խորհրդանշական ծառատունկով։
