Մարտի 21-ն Անտառների միջազգային օրն է, որը նշվում է 2012 թվականից՝ ՄԱԿ-ի Գլխավոր Ասամբլեայի հռչակմամբ և Անտառագետի օրն է՝ 2021 թվականի Հայաստանի Հանրապետության կառավարության որոշմամբ։
2025 թվականի կարգախոսն է «Անտառներ և սնունդ», որի ներքո օրվա առանցքում անտառների հանդեպ ուշադրությունն է։ Այս տարի անտառն աշխարհի ուշադրությանն արժանանում է հատկապես այն բարիքների համար, որ ստեղծվում են հենց անտառում։ Անտառներն ու ծառերը օգնում են կերակրել աշխարհը՝ բնապահպանականի հետ բերելով սոցիալական, տնտեսական, գյուղատնտեսական օգուտներ։
Մարտի 21-ն անտառների պահպանման և անտառային ռեսուրսների կայուն կառավարման կարևորությունը լայնորեն իրազեկելու խորհուրդ ունի։
Անտառներն ունեն հողապաշտպան, դաշտապաշտպան, ջրապաշտպան, հակաէրոզային, ջրակարգավորիչ, կլիմայակարգավորիչ և առողջարարական նշանակություն։ Անտառներն օդը հարստացնում են թթվածնով, բարձրացնում են օդի հարաբերական խոնավությունը, կարգավորում մթնոլորտային տեղումների քանակը, մեղմացնում կլիման, բարերար ազդեցություն թողնում շրջակա դաշտերի բերքատվության և մարդու առողջության վրա։
Հայաստանի անտառները երկրի տարածքի շուրջ 11 %-են կազմում։ Անժխտելի է, որ անտառածածկ տարածքների ավելացումը, անտառների վերականգնումն ու պահպանությունը դեռևս մտահոգիչ են։ Անտառների դերն անգին է հատկապես կլիմայի մերօրյա փոփոխության պայմաններում։ Եվ քանի դեռ Հայաստանը սակավանտառ երկիր է, կանաչ տարածքների ավելացումը, դրանց պահպանությունը, վերականգնումը, օգտագործումը պարտականությունն են ոչ միայն մասնագետի՝ անտառագետի, այլև՝ յուրաքանչյուրի։ Անտառն արժևորելը բոլորիս գործն է։
Շնորհավորում ենք բոլորին, շնորհակալություն հայտնում բոլոր մասնագետներին, ում համար անտառը պահպանելը, պաշտպանելը ոչ միայն աշխատանք է, այլ նաև՝ ապրելակերպ:
